أسلوب الشرط شرح جميل - نحو

# أسلوب الشرط

- متى تذاكر دروسك جيدا تتفوق.
- لو تذهب فسأذهب معك.
- إذا سجدتم فتذكروني بدعوة.
- إن تنصروا الله ينصركم.

كل العبارات اللي فوق دي أساليب شرط ... أساليب الشرط دي بتتكون من تلات أركان:
1- أداة الشرط.
2- جملة فعل الشرط.
3- جملة جواب الشرط.
ودي طبيعة أي أسلوب شرط ... المهم ندخل في المهم بقى (.

- أدوات الشرط بتنقسم لنوعين:
1- أدوات شرط جازمة.
2- أدوات شرط غير جازمة.
أدوات الشرط الجازمة
دي أدوات بييجي بعدها فعلين مجزومين ... والفعلين دول هما فعل الشرط وفعل جواب الشرط.
- أدوات الشرط الجازمة هي (إنْ – من – مهما – ما – متى – أيان – أين – أينما – أنَّى – حيثما – كيفما – أي). 
الفعل المضارع بعدهم بيكون مجزوم:
- بالسكون ... لو مش آخره حرف علة ولا من الأفعال الخمسة (يعني متصل بواو الجماعة – ألف الاثنين – ياء المخاطبة) زي (إن تذاكرْ تنجحْ) – (أي طالب يجتهد ينل ما يحلم به) ... (تذاكر – تنجح – يجتهد – ينل) فعل مضارع مجزوم بالسكون.

- بحذف حرف العلة ... لو هي في الأصل آخره حرف علة ومش متصل بـ(واو جماعة – ألف اثنين – ياء مخاطبة) زي (متى تدعُ إلي الله تجنِ كل خير) .. وزي (أيان تسع إلي المجد تحظَ كل مكانة عالية) ... (تدع – تجن – تسع – تحظ) فعل مضارع مجزوم بحذف حرف العلة.
- بحذف النون ... لو هي من الأفعال الخمسة (يعني متصل بواو الجماعة – ألف الاثنين – ياء المخاطبة) .... زي (أينما تهملا تفشلا) – (كيفما تعاملوا الناس يعاملوكم) – (إن تسعي إلي المجد تجني كل خير) ... (تهملا – تفشلا – تعاملوا – يعاملوكم – تسعي –تجني) فعل مضارع مجزوم بحذف النون.
أدوات الشرط غير الجازمة
- أدوات الشرط غير الجازمة هي (لو – لولا – إذا – كلما – لما)
- هنتكلم عن كل واحدة منهم سريعا:
1- لو:
حرف امتناع لامتناع ... يعني ايه؟ ... لما أقول (لو لعب أحمد لفزنا) ... بس الحقيقة إن أحمد ما لعبش ... وعشان كدة ما فزناش ... فامتنع الفوز لامتناع مجيء أحمد ... فعشان كدة بنقول حرف امتناع لامتناع.

2- لولا:
حرف امتناع لوجود ... أكيد لاحظت دي المرادي ... لما أقول (لولا القائد لهزمنا) .... هنا معني الكلام وجود القائد منع الهزيمة .... فعشان كدة بنقول حرف امتناع لوجود.

3- إذا:
بتفيد اليقين دا من ناحية المعني ... لكن هي نحويا ظرف مبنى ... وفي نفس الوقت أداة شرط ... فعشان كدة بنسميها (ظرف شَرطي) ... وزيها أدوات الشرط (متى – أيان – أين – أينما – أنَّى – حيثما) كلهم ظروف شرطية.

4- (لما – كلما):
ظروف شرطية الاتنين ... وبييجي بعدهم ماضي بس ... وبيكون من الخطأ إنه ييجي بعدهم مضارع.

ملاحظات علي أدوات الشرط

1- الاسم بعد (لولا) بيتعرب مبتدأ خبره محذوف.
2- أدوات الشرط (إنْ – لو – إذا) لما بييجي بعدهم اسم بيكون إعرابه فاعل لفعل محذوف بيدل عليه الفعل اللي بعده ... زي (إذا الولد ذاكر نجح) ... بيكون إعراب (الولد) فاعل مرفوع بالضمة ... أصل الجملة هو (إذا ذاكر الولد ذاكر نجح).
تنبيه: ممكن يكون إعراب الاسم نائب فاعل لو بعده فعل مبني للمجهول زي (إذا الشمس كورت).
3- الجمل بعد الظروف الشرطية بتكون في محل جر مضاف إليه.
4- أداة الشرط (أي) لما اطلب منك تربطلي بين جملتين بأداة شرط جازمة وتكون بادئة باسم زي (طالب يذاكر – ينجح) فبتكون الإجابة (أي طالب يذاكر ينجح) ... ما ينفعش تستخدم أي أداة غيرها هنا.

اقتران جواب الشرط بالفاء
جواب الشرط بيقترن بالفاء لاااازم لما تتحقق حاجة من اللي هنقولهم دول:
("اسمية طلبية وبجامد وبما وقد ولن وبالتسويف")
معني الكلام دا إن لو جواب الشرط جملة اسمية بيقترن بالفاء فمثلا (تذاكر – أنت ناجح) ... مع أداة الشرط هتكون (إن تذاكر فأنت ناجح).
كذلك لو الجملة طلبية يعني (أمر – نهي – استفهام – تمني – رجاء) ... وكذلك لو بادئة بـ(ما النافية – قد – لن – سوف أو السين).
محل جملة جواب الشرط
جملة جواب الشرط إما تكون في محل جزم وإما يكون ما لهاش محل.

#- امته تكون في محل جزم؟
بتكون في محل جزم بشرطين:
1- ييجي قبله أداة شرط جازمة.
2- يكون جواب الشرط مقترن بالفاء.
لازم الشرطين يتحققوا مع بعض وإلا جملة جواب الشرط ما يكونش ليها محل من الإعراب.
أمثلة:
1- إن تذاكر فستنجح.
هنا أداة الشرط جازمة ... وجواب الشرط مقترن بالفاء ... الشرطين اتحققوا ... تبقى جملة (ستنجح) في محل جزم.

2- إن تذاكر تنجح.
هنا أه أداة الشرط جازمة بس جواب الشرط مش مقترن بالفاء ... شرط واحد ما اتحققش فبالتالي خلاص مش في محل جزم ... جملة جواب الشرط (تنجح) لا محل لها من الإعراب.

3- إذا ذاكرت فستنجح.
هنا أه جواب الشرط مقترن بالفاء ... لكن أداة الشرط غير جازمة ... عشان كدة جواب الشرط لا محل له.
4- إذا ذاكرت نجحت.
هنا ما فيش ولا شرط اتحقق ... فبالتالي الجملة لا محل لها.