أسلوب المدح والذم مهم - نحو

#-أسلوب المدح والذم.

نعم صفة الصدق.
نعم الرجال أبو بكر.
بئس ما تفعله الكذب.
حبذا الإيمان بالله.
لا حبذا السرقة.

- أسلوب المدح والذم هو أنك تعجبك حاجة فتشكر فيها وهو دا المدح أو أن حاجة ما تعجبكش فتعيب فيها وهو دا الذم.
- أسلوب المدح والذم بيتكون من تلات حاجات:
1- فعل المدح أو الذم. 2- فاعل. 3- المخصوص بالمدح أو الذم.

#- أفعال المدح والذم في منهجك مجموعتين (نعم وبئس) – (حبذا ولا حبذا).
المدح والذم بـاستخدام (نعم وبئس)
- (نعم وبئس) ...(نعم) فعل مدح ... (بئس) فعل ذم ... الاتنين أفعال جامدة ... يعني مش بييجي منها إلا الماضي.
- (نعم وبئس) ... إعرابهم ... فعل ماض جامد مبني على الفتح.
- حكم تأنيث الفاعل مع (نعم وبئس) جائز ... يعني لو الفاعل مؤنث زي (الفتاة) ينفع تقول (نعمت الفتاة شيماء) وينفع تقول (نعم الفتاة شيماء).
- لاااازم يفصل بين (نعم وبئس) والمخصوص بالمدح أو الذم ... فاعل ظاهر أو تمييز... المخصوص بالمدح أو الذم مش بييجي بعدهم ع طول.

#-

الفاعل مع (نعم وبئس) ليه أربع صور:
1- معرف بأل ... زي (نعم الأبناء ابنك) – (بئس الخصلة الرياء).
2- مضاف لمعرف بأل ... زي (نعم دار المتقين الجنة) – (بئس مصير الكافرين النار).
3- ضمير مستتر يدل عليه تمييز ... زي (بئس صفة التخاذل) – (نعم سلاحين العلم والإيمان) ... هنا الفاعل ضمير مستتر ... و(صفة – سلاحين) تمييز منصوب.
4- اسم موصول (من – ما) ... زي (نعم من تختار أحمد) – (بئس ما تفعله الكسل) ... هنا (من – ما) اسم موصول مبني في محل رفع فاعل.

المخصوص بالمدح أو الذم

ودي الشيء أو الشخص اللي بتمدحه أو بتذمه ... ودا ليه إعرابين إما مبتدأ مؤخر ... أو خبر لمبتدأ محذوف وجوبا تقديره (هو).
مثلا (نعم عملا الصدق) ... أنت بتمدح ايه؟ ... (الصدق) ... يبقى هو دا المخصوص بالمدح وإعرابه مبتدأ مؤخر.
- إعراب (نعم الولد محمد).
نعم: فعل ماض جامد مبني على الفتح.
الولد: فاعل مرفوع وعلامة رفعه الضمة.
محمد: مبتدأ مؤخر مرفوع وعلامة رفعه الضمة، والجملة الفعلية (نعم الولد) في محل رفع خبر مقدم.
ويجوز يكون إعراب (محمد): خبر لمبتدأ محذوف وجوبا تقديره (هو).

#

- لاااازم يفصل بين (نعم وبئس) والمخصوص بالمدح أو الذم ... فاعل ظاهر أو تمييز... المخصوص بالمدح أو الذم مش بييجي بعد فعله ع طول.
مثلا (نعم الطالب الذكي) ... مين اللي مدحته؟ (الطالب الذكي) يعني (الطالب) هو المخصوص بالمدح ... لا غلط ... ما فيش حاجة تفصل بينه وبين فعل المدح ... فما ينفعش ... يبقى المخصوص بالمدح والذم هو الكلمة اللي بعده ع طول ... اللي هي (الذكي) ويكون إعراب الجملة سريعا ... (نعم) فعل ماض ... (الطالب) فاعل ... (الذكي) مبتدأ مؤخر والجملة الفعلية (نعم الطالب) في محل خبر مقدم أو (الذكي) خبر لمبتدأ محذوف ... إعراب (الذكي) مش نعت بناء ع اللي قلناه ده.
ونفس النظام لو قلنا (نعم الخليفة عمر بن الخطاب).
انت مدحت مين؟ ... (الخليفة عمر) ...في حاجة فصلت بينها وبين فعل المدح؟ ... لا ... يبقى ما ينفعش تبقى مخصوص بالمدح ... يبقى الكلمة اللي بعدها اللي هي (عمر) هي المخصوص بالمدح. ويبقى الإعراب سريعا (نعم) فعل ماض ... (الخليفة) فاعل ... (عمر) مبتدأ مؤخر والجملة الفعلية (نعم الخليفة) في محل خبر مقدم أو (عمر) خبر لمبتدأ محذوف ... وإعراب (عمر) مش بدل ها ... ركز وصحصح. 
- (بئس العمل ما تفعله).
المخصوص بالمدح هو (ما) ... أما (العمل) فاعل.
- المخصوص بالمدح والذم ممكن يتحذف لما حاجة تدل عليه ... فبلاغيا مش بنبقى محتاجين نذكره ... زي قوله تعالى (إنا وجدناه صابرا نعم العبد إنه أواب) ... هنا المخصوص بالمدح محذوف وهو سيدنا أيوب عليه السلام ... وزيها (حسبنا الله ونعم الوكيل) ... هنا المخصوص بالمدح محذوف بردو لأنه معروف إنه الله ... وكذلك قوله تعالى (ونعم أجر العاملين) – (ولنعم دار المتقين).