أسلوب التعجب - نحو

أسلوب التعجب
يا لروعة الربيع!
ما أجمل السماء!
ما أمكر اليهود!
كيف فعل هذا! 
أعظم بمحمد نبيا!
لله دره فارسا!
- التعجب هو أنك تنبهر بحاجة أوي سواء الحاجة دي حلوة أو وحشة .... زي الأمثلة اللي فوق دي.
- أسلوب التعجب بينقسم لنوعين:
1- أسلوب تعجب قياسي: ودا ليه أوزان معينة بييجي عليه هنتكلم عنها بالتفصيل.
2- أسلوب تعجب سماعي: ودا مالوش أوزان معينة ... لكن ليه كام شكل سهل تعرفه.

أسلوب التعجب القياسي 
دا ليه وزنين بس وهما:
1- ما أفعله!
2- أَفْعِلْ به!

- إعراب (ما أفعله!) 
ما: ما التعجبية اسم مبني في محل رفع مبتدأ.
أفعل: فعل ماض جامد مبني على الفتح.
الهاء: ضمير مبني في محل نصب مفعول به.
المتعجب منه هنا بيتعرب مفعول به.

- إعراب (أَفْعِلْ به!) 
أفعل: فعل ماض جامد أتي على صيغة الأمر للتعجب.
به: الباء حرف جر زائد، والهاء ضمير مبني في محل رفع فاعل.
المتعجب منه هنا بيتعرب فاعل.

- ندخل على الأسئلة بقي:
1- ما أجمل الربيع فصلا!
ما: ما التعجبية اسم مبني في محل رفع مبتدأ.
أجمل: فعل ماض جامد مبني على الفتح.
الربيع: مفعول به منصوب وعلامة نصبه الفتحة.
فصلا: تمييز منصوب وعلامة نصبه الفتحة.

2- أعظم بالعلم سلاحا!
أعظم: فعل ماض جامد أتي على صيغة الأمر للتعجب.
بالعلم: الباء حرف جر زائد، والعلم: فاعل مجرور لفظا مرفوع محلا.
سلاحا: تمييز منصوب وعلامة نصبه الفتحة.

3- الربيع ما أجمله!
الربيع: مبتدأ أول مرفوع بالضمة.
ما: ما التعجبية اسم مبني في محل رفع مبتدأ ثان .... باقي الإعراب معروف.
4- ما كان أجمل الربيع!
ما: ما التعجبية اسم مبني في محل رفع مبتدأ.
كان: زائدة لا محل لها من الإعراب.
أجمل: فعل ماض جامد مبني على الفتح.
الربيع: مفعول به منصوب وعلامة نصبه الفتحة.

5- ما أعظمهما سلاحين العلم والإيمان!
سلاحين: تمييز منصوب وعلامة نصبه الياء.
العلم: بدل منصوب وعلامة نصبه الفتحة... ينفع تحطها بدل الضمير (هما) وهتفضل الجملة سليمة وشرحناها في درس البدل ... تعالي أنت هنا بس ياللي قلت (العلم) مفعول به ... و(هما) اللي متصلة بـ(أعظمهما) مش عاجبك يعني؟ ها؟! ... (العلم) مش هو المتعجب منه ... المتعجب منه هو (هما) في (ما أعظمهما).

6- أكرم بقوم رسول الله قائدهم.
رسول: مبتدأ ... قائد خبر ... والجملة الاسمية في محل نعت.

#-كام ملحوظة:
1- فعل التعجب فعل ماض جامد.
2- النكرة المنصوبة بعد أسلوب التعجب بـ(ما أفعله – أفعل به) بتتعرب تمييز منصوب.
3- (كان) الزائدة ... بتيجي مع صيغة (ما أفعله) ومش بتأثر ع الاعراب.
4- بعد أسلوب التعجب لما يكون المتعجب منه نكرة ... ممكن جدا ييجي بعده جملة نعت من مبتدأ وخبر فانتبه لده.

شروط الفعل في صيغ التعجب القياسية

مش أي فعل ينفع نتعجب بيه ونحطه على وزن (ما أفعل) أو (أفعل به) ... لا دي ليها كذا شرط ... ولو شرط واحد ما اتحققش ما ينفعش نحطه بالصيغة دي ... والشروط دي هي: 
(ثلاثي – تام – متصرف – قابل للتفاوت – مثبت – مبني للمعلوم – ليس للوصف الذي على وزن أفعل ومؤنثه فعلاء) 
هما سبعة شروط بس كررهم مع نفسك كذا مرة هتلاقي نفسك حفظتهم ... المهم يلا بقى نشرحهم واحدة واحدة ... عشان عارف ان أصلا معظمكم مش فاهم حاجة:

- ثلاثي: يعني من تلات حروف ... ما ينفعش مثلا الفعل يكون (أكرم – استطاع – انسجم).
- تام: يعني الفعل مش ناسخ ... يعني ما ينفعش (كان – أصبح – صار).
- متصرف: يعني ييجي منه مضارع وماضي وأمر ... يعني ما ينفعش (عسى – ليس).
- قابل للتفاوت: يعني يقبل التفضيل ... يعني ما ينفعش (مات – فنى –عدم) لأنه ما يقبلش.
- مثبت: يعني مش منفي ... يعني ما ينفعش (ما ذهب – ما نجح).
- مبني للمعلوم: يعني ما يكونش مبني للمجهول ... يعني ما ينفش مثلا (يُقال – يُرى).
- ليس الوصف منه على وزن أفعل الذي مؤنثه فعلاء: بعبارة أوضح يعني ما ينفعش يكون لون أو عيب .... لأن أحمر مؤنثه حمراء فما ينفعش .... ولأن أعمي مؤنثه عمياء فما ينفعش وكذلك أعرج وأعور وأكتع.

- ممكن نتعجب من حاجة غير مسموح بيها لكن بشكل غير مباشر.

- لو كان الفعل غير ثلاثي أو ناسخ أو لون نقدر نتعجب منه بأننا نجيب صيغة تعجب لحاجة ينفع نتعجب بيها ثم المصدر الصريح أو المؤول للحاجة اللي بنتعجب بيها مثلا:
- ما أكثر استخدامك للهاتف!
- ما أفضل أن تجتهد!
- ما أشد حمرة الشفق!
- أجمل بأن أصبح الحق واضحا!
- أجمل بإصباح الحق واضحا!

- لو كان الفعل منفي أو مبني للمجهول ... بنجيب صيغة تعجب لحاجة مسموح بيها ثم نجيب بعدها مصدر مؤول .... مثلا:
- ما أسوأ ألا تذاكر!
- أبشع بأن يُصدَق الكاذب!
أسلوب التعجب السماعي
ودا زي:
- لله دره فارسا!
- يا له جنديا!
- يا لك من قائد!
- كيف استطعت أن تهرب!

- النكرة المنصوبة بعد أسلوب التعجب (لله دره – يا له) تكون تمييزا منصوبا.
(فارسا – جنديا): تمييز منصوب بالفتحة.
- النكرة ممكن تتسبق بحرف جر زائد.
(قائد) تمييز مجرور لفظا منصوب محلا.