شرح أسلوب الاستثناء - نحو
أسلوب الاستثناء
- حضر الطلاب إلا محمدا.
- ما ذهبت الفتيات إلى الحديقة إلا سميرة.
الاستثناء معناه أنك تثبت شيء على الكل وتنفيها عن حاجة أو تنفي شيء عن الكل وتثبتها على حاجة ... الحاجة دي هي المستثنى ... واللي استثنينا منهم الحاجة دي هم المستثنى منه.
- في المثال الأول مثلا أثبتنا إن كل الطلاب حضروا بس نفينا الحضور ده عن محمد ... فكدة استثنينا محمد من الطلاب ... فمحمد كدة مستثنى ... والطلاب مستثنى منه ... وفي المثال التاني بردو نفينا ذهاب الفتيات للحديقة بس أثبتنا ذهاب سميرة ... فكدة استثنيا سميرة من الفتيات ... فيبقى سميرة هي المستثنى والفتيات هن المستثنى منه.
مكونات أسلوب الاستثناء التام
حسب اللي قلناه من شوية يبقى أي أسلوب استثناء تام وكامل بيتكون من تلات حاجات هي (المستثنى منه – أداة الاستثناء – المستثنى).
- أدوات الاستثناء بتنقسم إلي:
1- حروف زي (إلا – خلا – حاشا – عدا) .
2- أسماء زي (غير – سوى) .
3- أفعال زي (خلا – عدا – حاشا) .
هنتكلم عنهم كلهم ... وهنبدأ بـ(إلا) واعرف أنك لو فهمتها يبقى الدرس كله خلص وباقي حاجات عادية كدة ... وأحب اطمنك هي قاعدتها سهلة.
حرف الاستثناء (إلا)
(إلا) حرف استثناء ... الكلمة اللي بعد (إلا) بيختلف إعرابه حسب أسلوب الاستثناء ... فيه تلات أساليب نشرحهم الأول وبعد كدة ندخل ع الأمثلة ... يلا بينا
1- أسلوب تام مثبت:
هنا الأسلوب بيبقى تام يعني أسلوب الاستثناء بكل مكوناته (مستثنى منه – أداة استثناء – مستثنى) عشان كدة بنقول تام ... وهنا ما بيبقاش فيه أداة نفي وعشان كدة سميناه مثبت ... يبقى أسلوب تام مثبت ... في الأسلوب التام المثبت الكلمة اللي بعد (إلا) بتتعرب مستثني منصوب ... زي (حضر الطلاب إلا محمدا) ... كل مكونات أسلوب الاستثناء موجودة فيبقى تام ... وما فيش قبل الجملة أداة نفي فيبقى مثبت ... فالأسلوب هنا (تام مثبت) ... فبنعرب (محمدا) مستثنى منصوب بالفتحة.
2- أسلوب تام منفي:
هنا الأسلوب بردو بيبقى تام يعني أسلوب الاستثناء موجود بكل مكوناته (مستثنى منه – أداة استثناء – مستثنى) عشان كدة بنقول تام ... بس المرادي فيه أداة نفي في الجملة وعشان كدة سميناه منفي ... هنا الكلمة بعد (إلا) بيبقى ليها إعرابين إما مستثنى منصوب أو بدل والبدل من التوابع .... زي (ما حضر الطلاب إلا محمدًا أو محمدٌ) ... هنا كل مكونات أسلوب الاستثناء موجودة بردو فيبقى تام .... بس أداة النفي هنا موجودة فيبقى منفي ... فالأسلوب هنا (تام منفي) ... عشان كدة الكلمة بعد إلا بنعربها مستثنى منصوب لو قال (محمدا) ... أما لو قال (محمدٌ) فيبقى بدل مرفوع زي ما المستثنى منه (الطلاب) مرفوع بردو.
3- أسلوب ناقص منفي:
هنا بقى الاسلوب بيبقى ناقص يعني أسلوب الاستثناء مش موجود بكل مكوناته ... أسلوب الاستثناء بيبقى ناقص مكون ... المكون ده هو المستثنى منه ... فعشان فيه مكون ناقص سميناه أسلوب ناقص ... كمان بيبقى فيه أداة نفي فاسمه أسلوب منفي .... الكلمة اللي بعد إلا في الأسلوب المنفي بتتعرب حسب موقعها في الجملة ... زي (ما جاء إلا طالب) – (ماشاهدت إلا طالبا) ... إعراب (طالب) الأولي ... فاعل مرفوع بالضمة ... إعراب (طالبا) التانية ... مفعول به منصوب بالفتحة ... طب ازاي عرفنا؟ بص يا زيدي اتخيل كدة إنك حذفت أداة النفي وأداة الاستثناء ... هتبقى الجمل (جاء طالب) – (شاهدت طالبا) فبقى باين جدا ... إن (طالب) فاعل وإن (طالبا) مفعول به ... بس افتكر دي كلها تخيلات ... المهم دي أحسن طريقة تتأكد بيها إن الأسلوب اللي عندك نوعه ناقص منفي.
أمثلة على أسلوب الاستثناء
افهم كل أسلوب كويس، ااه مش هتعدي إلا لما تعرفهم اطلع راجع تاني يلا
أمثلة:
1- جاء الطلاب إلا طالبا.
2- ما اجتهد أحد إلا محمد.
3- ما اجتهد أحد إلا محمدا.
4- ما اجتهد أحد إلا أحمد.
5 - ما شاهدت من الطلاب إلا عمرا.
6 - ما جاء من طلاب إلا طالبًا أو طالبٌ أو طالبٍ.
7 – ليس عليكم إلا المذاكرة.
- في المثال الأول (جاء الطلاب إلا طالبا) ... المستثني منه موجود هو (الطلاب) ... وأكيد كل حاجة تانية موجودة كدة الأسلوب تام .... كمان مافيش أداة نفي يبقى الأسلوب مثبت ... يبقى نوع الأسلوب تام مثبت يبقى وانت مغمض عينيك الكلمة اللي بعد (إلا) مستثنى منصوب ... (طالبا) مستثنى منصوب بالفتحة.
- في المثال التاني (ما اجتهد أحد إلا محمد) ... المستثنى منه موجود هو (أحد) ... وبردو أكيد كل حاجة تانية موجودة يبقى الأسلوب تام ... بس هنا فيه بقى أداة نفي (ما) فيبقى الأسلوب منفي ونوع الأسلوب تام منفي ... يبقى ع طوول إعراب الكلمة اللي بعد (إلا) إما مستثنى منصوب أو بدل مرفوع ... بس تعالى كدة ... كلمة (محمد) أكيد مش منصوبة أصلها لو منصوبة كنا قلنا (محمدا) صح؟ فخلاااص كدة ما ينفعش نعرب (محمد) مستثنى لأن المستثني منصوب ... عشان كلمة (محمد) بدل مروع بالضمة ... بدل وبس.
- في المثال التالت (ما اجتهد أحد إلا محمدا) ... نفس المثال التاني بالظبط نوع الأسلوب تام منفي بردو ... بس هنا غيرنا وقلنا (محمدا) ... فكدة إعراب (محمدا) مستثنى منصوب وبس.
- في المثال الرابع (ما اجتهد أحد إلا أحمد) ... نفس المثال بس جاب كلمة مايبانش عليها علامة نصب ... كلمة (أحمد) ممنوعة من الصرف يعني ما ينفعش ننونها ونقول (أحمدا) ده غلط أكيد ... عشان كدة هنا لو قلت بدل بس صح ولو قلت مستثنى منصوب بس صح بردو ... بس خلي بالك لو طلب الإعراب بكل الأوجه الممكنة يبقى لااازم تذكر الإعرابين (مستثني) و(بدل).
- في المثال الخامس (ما شاهدت من الطلاب إلا عمرا) ... دا مثال مختلف نفكر بنفس الطريقة الأصلية بقى ماتنساش نفسك يا افندي ما تسرحش ... هنا المستثنى منه مش موجود ... تعالا عندك هنا ما تقوليش " ماهو مش (من الطلاب) مستثنى منه! " ... المستثنى منه ما يجيش قبله حرف الجر (من) الأصلي ... اعرف النقطة دي كويس ... تمام يبقى المستثنى منه مش موجود ... يبقى نوع الأسلوب ناقص ... وأكيد طالما ناقص يبقى فيه أداة نفي ... فكدة نوع الأسلوب ناقص منفي.
وحتى بص كدة لو حذفنا أداة النفي (ما) وأداة الاستثناء (إلا) ... هتبقى الجملة (شاهدت من الطلاب عمرا) ... الجملة لسا سليمة ... يبقى نوع الأسلوب ناقص منفي أكيد طالما لسا الجملة لسا سليمة ... ويبقى إعراب (عمرا) مفعول به منصوب بالفتحة.
#: المستثنى منه مش بيتسبق بحرف الجر (من) الأصلي ... بس ممكن يتسبق بأي حرف جر تاني زي (ما مررت بكل الحدائق إلا حديقتين) ... هنا نوع الأسلوب تام منفي ... (حديقتين) مستثنى منصوب أو بدل مجرور.
- في المثال السادس (ما جاء من طلاب إلا طالبًا أو طالبٌ أو طالبٍ) ... فاكر حرف الجر (من) قلنا ايه عليه؟ ... قلنا لو حرف الجر (من) اتسبق بنفي وجه بعده نكرة يبقى زااائد... يعني حرف الجر(من) هنا زائد مش أصلي ... يعني أصل الجملة (ما جاء من طلاب إلا طالبًا أو طالبٌ أو طالبٍ) ... ويبقى إعراب (طلاب) فاعل مجرور لفظا مرفوع محلا ... تعالي نبص بقى كدة في نوع أسلوب الاستثناء ... المستثنى منه موجود اللي هو (طلاب) يبقى تام ... فيه أداة نفي يبقى منفي ... كدة نوع الأسلوب تام منفي ... فيبقى الإعراب مستثنى منصوب أو بدل مرفوع حسب المحل أو بدل مجرور حسب اللفظ ... الاتنين صح حسب النطق أو قول طريقة الكتابة بقي(.
#في على المثال الخامس والسادس ملحوظتين بقي:
1- نقول تاني حرف الجر (من) لو جه قبله نفي وبعده نكرة يبقى حرف جر زااائد ... لو شرط واحد من الاتنين دول مش موجود يبقى حرف جر أصلي عادي.
2- أنا قاعد بقولك ع أساسيات من بدري وازاي تعرف انه تام ولا ناقص ومثبت ولا منفي إلخ الخ ... ركز معايا بقى يا زيدي في طريقة أسهل وأسرع من ده كله طالما فيه أداة نفي واستثناء عندك .... أي جملة فيها اداة نفي وأداة استثناء ... اتخيل انك حذفت أداة النفي وأداة الاستثناء لو فضلت الجملة سليمة يبقى نوع الأسلوب ناقص منفي والكلمة اللي بعد إلا حسب موقعها ... أما لو حذفت أداة النفي وأداة الاستثناء وبقت جملة رخمة ومش سليمة يبقى نوع الأسلوب تام منفي ... والكلمة اللي بعد إلا مستثنى أو بدل ... وبس كدة دي أبسط بكتير ... مثلا لو (ما جاء من الطلاب إلا عمر) ... احذفهم تبقى (جاء من الطلاب عمر) ... الجملة لسا سليمة يبقى نوع الأسلوب ناقص منفي وإعراب (عمر) فاعل ... ومثلا لو (ما جاء من طلاب إلا عمر) ... احذفهم تبقى (جاء من طلاب ٍ عمر) ... يع مش لايقة خالص أكيد مش سليمة يبقى نوع الأسلوب تام منفي ... والكلمة اللي بعد إلا بدل أو مستثنى منصوب .... وللمعرفة بس في الجملة الأخيرة دي حرف الجر (من) زائد.
- في المثال السابع ... (ليس عليكم إلا المذاكرة) ... هنا مافيش مستثنى منه فيبقى ناقص ... وفي أداة نفي (ليس) فيبقى منفي ... كدة نوع الأسلوب ناقص منفي ..من باب تسهيل الإعراب ... اتخيل انك حذفت أداة النفي (ليس) وأداة الاستثناء (إلا) ... هتبقى (عليكم المذاكرة) ... وحضرتك بقى هتغلط وتقول (المذاكرة) مبتدأ مؤخر وباقتناع كمان ... وكدة غلط ... احنا اتخيلنا ان احنا حذفنا (ليس) أما في الأول والآخر دي كلها تخيلات عشان نسهل الإعراب بس ماتنساش نفسك ... (ليس) بتدخل ع الجملة وبتخلي المبتدأ اسمها والخبر خبرها ... فعشان كدة غلط اننا نقول ان (المذاكرة) مبتدأ مؤخر ... لأ الصح اننا نقول (المذاكرة) اسم ليس مؤخر.
تعليقات
إرسال تعليق