شرح الممنوع من الصرف مهم - نحو

الممنوع من الصرف

الممنوع من الصرف ... يعني الممنوع من التنوين ... الطبيعي في أي كلمة طالما إنها مش فعل أو حرف إنها تتنون ... بس في كلمات رغم كدة كلمات معينة مش بتتنون ودا موضوعنا ... ودا تقدر تقول إنه من الدرس السهلة جدا نظرا لللي أنت مطالب بيه كطالب فاطمن جدااا (
قلنا الممنوع من الصرف هي الكلمات الممتنعة من التنوين ... الكلمات دي بتتمنع بقواعد وشروط ... ودول بنسميهم هنا في درسنا علل (اللي هي جمع علة) ... في كلمات بتبقى ممنوعة من الصرف لعلة واحدة وكفاية كدة ... وفي كلمات بتبقى ممنوعة لعلتين لااازم الاتنين يحصلوا مع بعض ... والممنوع من الصرف لا يُنوَن يُرفَع بالضمة ويُنصَب بالفتحة بس يختلف إنه يُجرَّ بالفتحة طالما مابدأش بأل وطالما ما جاش بعده مضاف إليه ... أما لو حصل حاجة منهم يجر بالكسرة عادي.

📌الكلمات الممنوعة من الصرف:
1- لعلة واحدة:
الكلمات الممنوعة من الصرف لعلة واحدة تلات مجموعات:
1- صيغة منتهي الجموع ... ودي كل كلمة جمع في وسطها ألف بعدها حرفين أو تلات حروف وسطهم ياء ... زي (مساجد – مصانع – مبادئ) وزي (سجاجيد – تلاميذ – مصابيح) ... أما (أساتذة – تلامذة) مش ممنوعين من الصرف ... أيوة بعد الألف تلات حروف ... بس ما فيش في وسطهم ياء.
🌹 كام ملحوظة:
- ممكن صيغة منتهى الجموع تبقى آخرها ياء قبلها مكسور ... يعني اسم منقوص زي (مراعي – مساعي – نواحي – مناحي) ... والاسم المنقوص لما يكون نكرة مجرورة أو مرفوعة بنحذف ياءه وبنحط بدالها تنوين عوض عن الياء اللي حذفناها فهتبقى (مراعٍ – مساعٍ – نواحٍ – مناحٍ) ... وفي حالة الجر بيكونوا مجرورين بالفتحة المقدرة ... زي (ذهبت إلى مناحٍ كثيرة) ... هنا إعراب (مناحٍ) اسم مجرور بالفتحة المقدرة.
- ممكن صيغة منتهى الجموع تنتهي بحرف واحد مشدد زي (مهامَّ – مضارَّ – خواصَّ) ... فانتبه لده لأنه مش ملحوظ.
- نستثني من صيغة منتهى الجموع كلمة (صحابة) وما على وزنها.

2- الاسم المنتهي بألف وهمزة زائدتان ... قلنا قبل كدة همزة الاسم الممدود ليها تلات أنواع (أصلية – منقلبة – زائدة) ... اللي بيكون ممنوع من الصرف فيهم بس هو اللي همزته زائدة وبتبقي زائدة للتأنيث زي (صفراء – صحراء) وزائدة للجمع زي (شعراء – أدباء) ... أما لو الهمزة أصلية أو منقلبة زي (إنشاء – سماء – أبناء) فكدة مش ممنوعين من الصرف كدة مصروفين.

3-الاسم المنتهي بألف التأنيث المقصورة ... ودي زي (بشرى – سُلمى – حُبلى).
2- لعلتين:
الكلمات الممنوعة من الصرف لعلتين نقدر نقسمهم فريقين فريق ممنوع لأنه علم (العلة الأولى) مع علة تانية ودول ستة ... وفريق ممنوع لأنه صفة (العلة الأولى) مع علة تانية ودول تلات فرق.

📌- لعلة العلمية مع علة أخرى:
1- علم أعجمي حروفه أكثر من ثلاثة لا يتوسطهم ساكن ... وهنا المقصود كل أسماء الأشخاص والأماكن وكل ما ينطبق عليه لفظة العلم في لغات غير العربية ... مثلا كل الشهور الميلادية (يناير فبراير ...إلخ) مثلا زي (فرعون – إسحاق – إبراهيم – إسماعيل) ... واعرف إن كل أسماء الرسل المعروفة ممنوعة من الصرف إلا ستة (نوح – صالح – شعيب – محمد – لوط – هود) وهتلاقيهم مجموعين في كلمة (نص شمله) ... ولازم تعرف إنه لازم يكون أكتر من تلات حروف ... عشان كدة (نوح – هود – لوط) مصروفين وكذلك (جون).

2- علم مؤنث ... العلم المؤنث بينقسم لتلات أقسام ... أولهم مؤنث لفظي ومعنوي (كل علم مؤنث دل على مؤنث وبه علامة تأنيث ... زي فاطمة وسامية ورفيدة) ... ثانيهم مؤنث لفظي لا معنوي ( كل علم لم يدل على مؤنث ولكن به علامة تأنيث ... زي حمزة ومعاوية وطلحة) ... ثالثهم مؤنث معنوي لا لفظي (كل علم دل على مؤنث ولكن ليس به علامة تأنيث زي سعاد وحنين وروان) ... وسواء كان أي قسم من التلاتة فهو ممنوع من الصرف ... بس العلم المؤنث لو من تلات حروف ومتحرك الوسط زي (سحَر – سقَر – لظَى – أمل -قمر) بيكون ممنوع من الصرف عادي ... أما لو كان من تلات حروف وساكن الوسط زي (هنْد – شهْد – عدْن – مي) يجوز إنه يكون ممنوع من الصرف ويجوز إنه يكون مصروف.

3- علم منتهي بألف ونون زائدتين ... زي (لقمان – عدنان – رمضان – شدوان – غسان – عثمان – عفَّان) ... هنا كل الكلمات دي الألف والنون زيادة فيهم ... لأن مادتهم مش بتحتوي ع النون اللي في الآخر.

4- علم على وزن الفعل ... ودا زي (أحمد – يزيد – يعرب – تغلب – ينبع – أكرم – أسعد) ... والمقصود بالكلمات دي إنهم على وزن الفعل إنهم أحيانا بنستخدمهم كأفعال مثلا كلمة (أحمد) ... ممكن تقول (أحمد الله على كل شيء) فكدة فعل ... وممكن تقول (أحمد فتى جيد) فكدة اسم ... وكذلك (يزيد) .... (يزيد الماء غليانا) كدة فعل ... (جاء يزيد بن معاوية) كدة اسم.

5- علم على وزن فُعَل معدول عن (فاعل) ... ودول 15 اسم فقط (عُمَر – زُحَل – هُبَل – قُزَح – جُحَا – قُثَم – زفر – جشم – جمح – دلف – مضر – ثعل – هدل – عصم – بلع) ... كلمة من تلات حروف أول حرف مضموم والتاني مفتوح معدولة عن وزن (فاعل) ... أي حاجة غير الخمسة عشر دول يبقى مصروف عادي ... مش كل علم على وزن (فُعَل) بيكون ممنوع ... لازم يكون معدول بردو.
باختصار: أهمهم هم أول شوية خاصة أول خسمة.

6- علم مركب تركيبا مزجيا ... زي (بورسعيد – حضرموت – بعلبك – بورتوفيق).

🎀- لعلة الصفة مع علة أخرى:
1- صفة على وزن أفعل .... ودا بشرط إن مؤنثها يكون على وزن (فُعلى) أو (فعلاء) ...زي (أفضل – أحسن – أحمر – أبيض) ممنوعين من الصرف ... أما (أرنب – أرمل – أربع) مصروفين لأن مؤنثهم (أرنبة – أرملة – أربعة) ... مثل (هذا رجل أرنب) و(سلمت على فتيات أربع) ... والمقصود بكلمة (أرنب) ضعيف جبان.

2- صفة منتهية بألف ونون زائدتين ...زي (عطشان – سكران – جوعان – ريَّان).

3- صفة على وزن (مَفْعَل) أو (فُعَال) أو على وزن (فُعَل) زي (أُخَر)...على وزن (مَفْعَل) و(فُعَال) زي (موحد – أُحاد – مَثنى – ثُناء – ثُلاث – رُباع – عُشار – مَعشر