أنواع كان مهم جدا - نحو لجميع المراحل

# أنواع كان

كان ليها تلات أنواع وهم:
#1- كان الناسخة:
ودي اللي اتكلمنا عليها في الدرس ده .... وهي اللي بترفع المبتدأ وبيبقى اسمها وبتنصب الخبر ويبقى خبرها ... وتقدر بردو تسميها (كان الناقصة).

# 2- كان الزائدة:
- مش هنتكلم عنها كتيير أنت يهمك حالة واحدة هي اللي ممكن تقابلك ... المهم كان الزائدة ... دي ينفع تشيلها من الجملة خالص .... ومالهاش اي تأثير خااالص على الجملة من الناحية النحوية ... مثلا بتقول (محمد كان مريض) .... لو كانت (كان) ناسخة ... كنا قلنا (محمد كان مريضا) مش مريض .... فبما إن ما فيش تأثير ليها ع الجملة يبقي إعراب (محمد كان مريض) .... (محمد) مبتدأ مرفوع وعلامة رفعه الضمة ... (كان) زائدة لا محل لها ... (مريض) خبر مرفوع وعلامة رفعه الضمة ... وعموما مش دي الحالة اللي تهمك ... الحالة اللي تهمك هي إن (كان الزائدة) بتيجي مع أسلوب التعجب ... وبتكون بصيغة (ما كان أفعله) .... مثلا (ما كان أجمل الربيع) ... بتعربها عادي جدا وكأن (كان) مش موجودة يعني بتعتبر الجملة (ما أجمل الربيع) .... فبالتالي هيكون إعراب (ما كان أجمل الربيع) .... (ما) ما التعجبية اسم مبني في محل رفع مبتدأ .... (كان) زائدة لا محل لها ... (أجمل) فعل ماض مبني على الفتح ... (الربيع) مفعول به منصوب وعلامة نصبه الفتحة ... وجملة (أجمل الربيع) في محل رفع خبر للمبتدأ (ما).

3- كان التامة: 
- يعني ايه (كان التامة) يعني بييجي بعدها فاعل ... وبكدة بتختلف عن (كان الناسخة) اللي بييجي بعدها اسم وخبر كان.

- (كان) امته بتبقي تامة؟ ... (كان) بتبقي تامة بشرط معين وساعتها بيبقي معناها في أغلب الأوقات (تواجد أو حصل) ... المهم الشرط اللي لااااازم يتحقق هو:

1- ما يكونش فيه أي حاجة تقوم بدور الخبر بعدها ... سواء الحاجة دي جملة أو كلمة أو شبه جملة.

أمثلة:
- (اتق الله حيثما كنت) .... هل هنا في خبر؟ .... لأ هنا ما فيش خبر ليها ... وكان بمعني (تواجدت) ... تبقي كان تامة ... إعراب (كنت) فعل ماضي مبني على السكون والتاء ضمير مبني في محل رفع فاعل.

- (اتق الله حيثما كنت موجودا) .... هل هنا فيه خبر لكان؟ .... ايوة هنا في خبر ليها اللي هو (موجودا) ... يبقي هنا كان ناقصة أو ناسخة الاتنين حاجة واحدة ... ويبقي إعراب (كنت) ... فعل ماضي ناسخ مبني على السكون ... التاء ضمير مبني في محل رفع اسم كان.

- (اجتهدت فكان النجاح) .... هل هنا في خبر؟ .... لأ هنا مافيش خبر ليها ... يبقي (كان)هنا تامة ... وإعراب (النجاح) فاعل مرفوع.

- (اجتهدت فكان النجاح من نصيبي) .... هل هنا في خبر؟ ... ايون فيه وهو شبه الجملة (من نصيبي) ... وكدة تقول إن (كان) هنا مش تامة .... وبالتالي إعراب (النجاح) هو اسم كان.

- أمثلة أكتر على (كان التامة) ... (إذا كان الصباح فستراني عندك) – (امتلأت السماء بالغمام فكان المطر) ... (لولا الله لما كنا) ... (ما شاء الله كان وما لم يشأ لم يكن).

حبة بهاريز نسيناهم 

أخوات كان من حيث التمام والنقصان

أخوات كان اللي بيبقوا تامين ليهم نفس الشروط بتاعة (كان) لما تبقي تامة ... بس مش كلهم بينفع يبقوا تامين ... ونقدر نقسمهم لتلات أنواع هما:

1- أفعال عمرها ما تبقي تامة أبدا زي (ليس – ما فتئ) ... ودول دايما دايما أفعال ناسخة فريح دماغك.

2- أفعال ليها شروط معينة زي (ما برح – ما زال) .... ودول نشرحهم واحدة واحدة:
(ما برح) ... لما يكون معناها (غادر) أو (رحل عن) .... بتبقي تامة ... لأنها ما بقتش تفيد الاستمرار زي مثلا لو قلنا (ما برح الرجل الدار) .... هنا الإعراب (ما برح) ما نافية وبرح فعل ماض .... (الرجل) فاعل مرفوع بالضمة .... (الدار) مفعول به منصوب بالفتحة .... أما لو كنا قلنا (ما برح الرجل في الدار) ... فدي معناها من الاستمرار فيبقي الإعراب .... (ما برح) ما نافية، برح فعل ماض ناسخ ... (الرجل) اسم ما برح مرفوع .... (في الدار) جر ومجرور وشبه الجملة في محل خبر (ما برح).

(ما زال) ... لما يكون معناها جاي من الزوال .... مثلا (ما زال إيماني بالله من قلبي) .... هنا الإعراب .... (ما زال) ما نافية , زال فعل ماض ... (إيماني) إيمان فاعل وياء المتكلم ضمير في محل مضاف إليه ... (بالله) جر ومجرور .... (من قلبي) جر ومجرور وياء المتكلم في محل مضاف إليه ... أما لو كنا قلنا (ما زال إيماني بالله في قلبي) ... (ما زال) ما نافية، زال فعل ماض ناسخ .... (إيماني) إيمان اسم ما زال، ياء المتكلم في محل جر مضاف إليه ... (بالله) جر ومجرور ... (في قلبي) جر ومجرور ومضاف إليه وشبه الجملة في محل خبر مازال.

وباختصار لو مضارع (ما زال) هو (ما يزال) تبقى ناسخة ... لو مضارع (ما يزول) تبقى تامة.

3- أفعال ليها نفس شرط (كان) التامة اللي قلناه وهو إن ما فيش حاجة تقوم بدور الخبر بعديها ... زي لو قلنا:-
(فسبحان الله حين تمسون وحين تصبحون) ... هنا (تمسون – تصبحون) أفعال تامة ... و(واو الجماعة) في محل فاعل.
(خالدين فيها ما دامت السماوات والأرض) ... (دامت) فعل تام ... (السماوات) فاعل.
(ألا إلى الله تصير الأمور) ... (تصير) فعل تام ... (الأمور) فاعل