تعدد الخبر - نحو لجميع المراحل
# تعدد الخبر
افرض الشخص اللي بيتكلم عايز يخبرنا بكذا حاجة مش ممكن بدل ما يعمل كذا جملة ويكتر في الكلام ... يخلي كل اللي عايز يخبرنا بيه في جملة واحدة ... وده بقى نتج عنه تعدد الخبر مثال (الله غفور رحيم كريم رؤوف)
(الله) مبتدأ ... (غفور) خبر أول ... (رحيم) خبر ثان ... (كريم) خبر ثالث ... (رؤوف) خبر رابع ... وممكن تكمل لما لا نهاية ... بس في شرط لتعدد الخبر ... هو إنك لو خدت المبتدأ لوحده مع أي خبر من الأربعة أو مهما كان عدد الأخبار عندك يديك جملة سليمة بردو ... يعني ينفع نقول (الله غفور) سليمة (الله رحيم) سليمة بردو.
أما لو جيت مثلا قلت (أنا طالب علم يسعى للعلم ما دام حيا) ... (طالب) خبر مرفوع بالضمة ... (علم) مضاف إليه ... عايزين نشوف بقى (يسعي) تنفع في محل رفع خبر ثان ولا؟ نعمل ايه؟ نعمل زي ماقلنا من شوية ناخد المبتدأ و(يسعي للعلم) مع بعض ... (أنا يسعي للعلم) رخمة صح؟ خلاص اتأكد إنها مش خبر.
أما لو كنا قلنا (أنا طالب علم أسعى للعلم ما دمت حيا) ... لو جينا ناخد المبتدأ و(أسعى للعلم) مع بعض ... هتبقى (أنا أسعى للعلم) دي لايقة يبقى أكيد خبر ... الخبر لازم يطابق المبتدأ.
# بهاريز
هنتكلم بقى عن شوية بهاريز لازم تنتبهوا ليها:
1- (الطيور لها أجنحة) ... كتير أوي بيغلطوا في سؤال زي ده ... ومن الحاجات الغريبة اللي شفتها إن حد يعرب (أجنحة) مضاف إليه ... فعشان كدة خد القاعدة دي ... "ما فيش مضاف إليه ييجي بعد ضمير أبدا" ... والهاء في (لها) ضمير فمستحيل يكون بعدها مضاف إليه ... المهم نبدأ ناخدها حتة حتة ... المتكلم بدأ بكلمة (الطيور) ... يبقى الطيور مبتدأ ... المتكلم حب يخبرنا إن (لها أجنحة) .... (لها اجنجة) دي جملة ... جملة جوا الجملة ... خلاص بقى نعربها لوحدها بانعزال تام ... (لها أجنحة) خلاص كدة سهلة ... (لها) جر ومجرور شبه جملة في محل خبر مقدم ... (أجنحة) مبتدأ ثاني مؤخر ... وزي ماقلنا مؤخر وجوبا ... المهم جملة (لها اجنجة) بقى ... جملة في محل رفع خبر للمبتدأ الأول (الطيور) ... وكدة نوع الخبر خبر جملة اسمية.
2- (الإسلام أسلوب حياة) ... ايه نوع الخبر؟ ... الخبر مفرد ... دلوقتي ناس معترضة تقولي ازاي دي كلمتين أسلوب وحياة مش كلمة واحدة؟! ... أنت ما بتبصش كام كلمة أدت المعني ... أنت بتبص ايه اللي اتعرب خبر لو كلمة لوحدها اتعرب خبر تبقى خبر مفرد ... لو اللي اتعرب خبر هو جملة ع بعضها يبقى الخبر جملة ... أعرب كدة (الإسلام أسلوب حياة) ... (أسلوب) خبر ... خبر لوحدها بس فيبقى نوع الخبر مفرد ... أما لو قلنا (الحديقة أزهارها جميلة) ... تعالى نعرب ونشوف كدة (أزهارها) مبتدأ ثان ... (جميلة) خبر المبتدأ الثاني ... بعد كدة الجملة الاسمية في محل خبر ... ففي فرق كبير أكيد لاحظته.
3- (جيشنا الأقوى ولا يستطيع أحد أن ينكر ذلك أبدا) ... يلا وريني إعرابك كدة؟ ماشي ... (جيشنا) جيش مبتدأ ونا ضمير مبني في محل جر مضاف إليه ... (الأقوى) نعت مرفوع بالضمة ... (الواو) حرف استئناف ... استنى بقى عندك شايف اللي أنت عملته (جيشنا الأقوى) المفروض كدة الجملة خلصت ... وبالرغم من ده أنت ما عرفتنيش الخبر فين ... أنت جبتلي مبتدأ ونعت ... ما فيش خبر ... ما ينفعش جملة من غير خبر أبدا ... تعالى بقى نصحح غلطة عندك ... الاصل في الجملة الاسمية ان المبتدأ يبقى معرفة والخبر يبقى نكرة ... بس دا ما يمنعش أن الاتنين يبقوا معرفة ... المبتدأ والخبر ينفع الاتنين يكونوا معرفة؟! ااه صحح المعلومة دي بقى ... يبقى (جيشنا الأقوى) لو الجملة خلصت كدة ... يبقى (جيشنا) مبتدأ والضمير في محل مضاف إليه ... (الأقوى) خبر مرفوع بالضمة .... عارف لو كانت الجملة (جيشنا الأقوى انتصر) ... كانت هتبقى (جيشنا) مبتدأ وضمير في محل مضاف إليه ... (الأقوى) نعت مرفوع بالضمة ... (انتصر) فعل ماض ... والفاعل ضمير مستتر ... والجملة الفعلية في محل خبر ... هنا في المثال التاني أعربنا (الأقوى) نعت ... لأن في حاجة تقوم بدور الخبر غيرها ... أما في المثال الأول أعربنا (الأقوى) خبر لأننا لو أعربناها حاجة تانية غير كدة مش هيبقى فيه خبر في الجملة وده ما ينفعش ... الخبر أولى بالإعراب من أي حاجة سواء كانت نعت ولا بدل ولا ولا ... حط دي حلقة في ودنك ماتنسهاش أبدااا.
**
فلو قلت (هذا القاتل) وأنهيت الجملة ... فالإعراب (هذا) في محل مبتدأ ... (القاتل) خبر مش بدل .... لأن ما فيش حاجة تقوم بدور الخبر غيرها ... أما لو قلت (هذا القاتل مكروه) ... هنا (هذا) في محل مبتدأ ... (القاتل) بدل مش خبر لأن فيه حاجة تقوم بدور الخبر غيرها وهي كلمة (مكروه)
تعليقات
إرسال تعليق