لا النافية للجنس شرح وافي جدا - نحو

لا النافية للجنس

- لا النافية للجنس دي حرف ناسخ زي إن وأخواتها بردو ... بتدخل ع المبتدأ والخبر ... فتنصب المبتدأ ويسمى اسمها وترفع الخبر ويسمى خبرها ... نفس عمل إن وأخواتها بالظبط ... بس مختلفة في إن ليها كام شرط كدة واختلاف تاني هتلاحظه واحنا ماشيين في الدرس.

#- شروط لا النافية للجنس:

1- اسمها نكرة وخبرها لو كان نوعه مفرد يبقي نكرة بردو.
2- اسم لا النافية للجنس لازم ييجي بعدها ع طول من غير فاصل ... وطبعا بكدة ما ينفعش (خبر لا) يقدم. 
3- ما يدخلش عليها حرف جر .... مثلا (أنت شخص بلا رحمة) (ذهبت إلى لا مكان) – (أتيت من لا شيء) ... (رحمة – مكان – شيء) اسم مجرور بالكسرة.

لو شرط واحد من التلاتة دول ما تحققش تبقي لا مجرد حرف نفي عادي وييجي بعدها مبتدأ وخبر ... ولو اتسبقت بحرف جر بييجي بعدها اسم مجرور زي ماشفت من شوية.

فلو قلنا مثلا (لا فريقنا فائز ولا متعادل) ... هنا (لا) مش عاملة لأن الاسم بعدها (فريقنا) معرف بالإضافة مش نكرة ... فيبقي (فريقنا) مبتدأ ومضاف إليه ... (فائز) خبر مرفوع بالضمة ... و(متعادل) معطوف مرفوع.

ولو قلنا (لا بيننا مهمل ولا كسول) ... (لا) مش عاملة بردو ... لأن اسمها ما جاش بعدها ع طول ... فيبقي (بيننا) بين ظرف مكان منصوب و(نا) ضمير في محل مضاف إليه ... وشبه الجملة في محل رفع خبر مقدم ... (مهمل) مبتدأ مؤخر مرفوع بالضمة ... (كسول) معطوف مرفوع بالضمة ويجوز تكون مبتدأ خبره محذوف تقديره (كذلك) أو أي كلمة تؤدي المعنى.
لما (لا) ما تبقاش عاملة يلزم تكرار (لا) زي ما لاحظت في المثالين ... أما لو كانت (لا) عاملة فيجوز تكرارها ويجوز لأ ... المهم أنها لو غير عاملة فلاااازم تكرر (لا) وإلا تبقى غير صحيحة ودي تهم صانع الأسئلة أكثر.

#- أنواع اسم لا:

1- مفرد: بيبقي عبارة عن كلمة واحدة ... واحدة وبس ... ممكن يبقي مفرد مثني جمع ... المهم كلمة واحدة وبس وبعدها الخبر سواء بقى كان الخبر نكرة أو شبه جملة ... وبيكون مبني على ما ينصب به نشرح دي في الامثلة ... زي (لا مجتهد فاشل) – (لا محاربين ضعفاء) – (لا طالبات في الفصل) ..... نعرب كدة (لا مجتهد فاشل) ... (مجتهد) اسم لا مبني على الفتح في محل نصب ... (فاشل) خبر لا مرفوع بالضمة ... أما (لا محاربين ضعفاء) ... (محاربين) اسم لا مبني على الياء في محل نصب ... بنيناه على الياء لان (محاربين) جمع مذكر سالم بيتنصب بالياء ... فيبنى على ما ينصب به ... (ضعفاء) خبر لا مرفوع بالضمة .... اخير جملة (لا طالبات في الفصل) ... (طالبات) اسم لا مبني على الكسر في محل نصب ... بنيناه ع الكسر لان (طالبات) جمع مؤنث سالم بيتنصب بالكسرة ... (في الفصل) جر ومجرور وشبه الجملة في محل رفع خبر لا.

2- مضاف: دا بيبقى منصوب عادي جدا ... اسم لا بييجي بعده مضاف إليه ... المضاف إليه ده لازم يكون نكرة ... هنتكلم عن النقطة دي كمان شوية في وقتها ... النوع ده زي (لا صاحب خلق مكروه) (لا طالبي علم سيئون) (لا فاعلات خير خاسرات) .... (صاحب) اسم لا منصوب بالفتحة ... (طالبي) اسم لا منصوب بالياء ... أصلها (طالبين) بس تم حذف النون للإضافة فبقت (طالبي العلم) ... (فاعلات) اسم لا منصوب بالكسرة.

3- شبيه بالمضاف: دا بيبقي منصوب بردو ... وبيبقي أكتر من كلمة واحدة فمش مفرد ... ومش بعده مضاف إليه فمش نوعه مضاف ... فبنسميه شبيه بالمضاف ... المهم زي (لا ساعيا في الخير خاسر) - (لا طالبين علما سيئون) – (لا آمرات بالمعروف خائبات) .... (ساعيا) اسم لا منصوب بالفتحة ... (طالبين) اسم لا منصوب بالياء ... هنا ما حذفناش النون في (طالبين) لأن مافيش إضافة ... (آمرات) اسم لا منصوب بالكسرة.

#- الفرق بين المضاف والشبيه بالمضاف
أولا الاتنين بيبقوا منصوبين على أنهم اسم لا ... نفرق بينهم ازاي بقى؟ ... بص يا زيدي الفرق سهل جدا وهو كالتالي:

- لو كانت الكلمة اللي احنا شاكين فيها كلمة مفردة (يعني مش مثنى وجمع) ... بنشوف بقى لو لقينا في آخرها تنوين تبقى شبيه بالمضاف ... أما لو الكلمة ما فيش في آخرها تنوين تبقى مضاف عادي.... نوضحها اكتر بقى ... لو قلنا (لا طالبا علما خاسر) ... كلمة (طالبا) آخرها ألف ... الألف دي دليل ع انها منونة تبقى شبيه بالمضاف... أما لو قلنا (لا طالب علم خاسر) ... هنا كلمة (طالب) مافيهاش ألف ... يبقى ما فيش تنوين ... تبقى مضاف.

- طيب لو الكلمة اللي احنا شاكين فيها كانت جمع مثلا معلمين أو مثنى مثلا فتيين .... في الحالة دي بنعمل ايه بقى؟ ... شايف النون اللي في الآخر دى؟ اه مالها ... دي لو فضلت موجودة يبقى شبيه بالمضاف أما لو النون اتحذفت تبقى مضاف... مثلا لو قلنا (لا طالبين علما خاسرون) ... النون موجودة تبقى شبيه بالمضاف... أما لو قلنا (لا طالبي علم خاسرون) ما فيش نون تبقى مضاف. 
الخلاصة المضاف بيتحذف معاه التنوين ونون الجمع والتثنية

#- ونقدر نفرق بين أنواع اسم لا التلاتة بأننا نقول:
1- اسم لا المضاف هو اللي بييجي بعده مضاف إليه.
2- اسم لا الشبيه بالمضاف لازم يكون مشتق ومنون... وييجي بعده فاعل أو نائب فاعل أو مفعول به أو شبه جملة.
3- اسم لا المفرد هو اللي مش مضاف ولا شبيه بالمضاف.

فمثلا (لا ساعيا في الخير مكروه) .... هنا ساعيا مشتق منون فبالتالي هو اسم لا .... أما مثلا (لا سعادة في البشرية بدونه) ... هنا (سعادة) مش مشتق ... فبالتالي مش شبيه بالمضاف ... وما فيش بعد (سعادة) مضاف إليه ... فبالتالي مش مضاف ... فكدة أكيد نوعه مفرد لأن ما فيش غيره.