أسلوب الاختصاص - نحو

#أسلوب الاختصاص
1- نحن المصريين خير أجناد الأرض.
2- أنتم شباب مصر مجتهدون.
3- عليكم أيها الآباء مسئوليات كثيرة.
4- يجب علينا العرب استرجاع أرضنا فلسطين.
5- عَلِمْتكم شباب اليوم أمل كل غد.

أسلوب الاختصاص ... يعني ايه الاختصاص في النحو .... إن ضمير المتكلم أو المخاطب ييجي بعده الكلمة اللي بيعود عليها ... وبيكون إعراب الكلمة مفعول به لفعل محذوف وجوبا تقديره أخص ... تعالي بقى نمسك الأمثلة بتاعتنا واحد واحد:

- المثال الأول (نحن المصريين خير أجناد الأرض.)
هنا كلمة (المصريين) جت بعد ضمير متكلم (نحن) والضمير دا بيعود على الكلمة دي ... يبقي إعراب (المصريين) مفعول به منصوب وعلامة نصبه الياء.

- المثال الثاني (أنتم شباب مصر مجتهدون.)
هنا كلمة (شباب) جت بعد ضمير مخاطب (أنتم) والضمير دا بيعود على الكلمة دي... يبقي إعراب (شباب) مفعول به منصوب بالفتحة.

- المثال الثالث (عليكم أيها الأباء مسئوليات كثيرة.) 
هنا كلمة (أيها) جت بعد ضمير مخاطب (كم) والضمير دا بيعود على الكلمة دي ... يبقي إعراب (أيها) اسم مبني على الضم في محل نصب مفعول به والهاء للتنبيه.
كلمة (الأباء) نعت مرفوع بالضمة.
- المثال الرابع (يجب علينا العرب استرجاع أرضنا فلسطين.)
هنا كلمة (العرب) جت بعد متكلم (نا) والضمير دا بيعود على الكلمة دي .... يبقي إعراب (العرب) مفعول به منصوب وعلامة نصبه الفتحة.

- المثال الخامس (عَلِمْتكم شباب اليوم أمل كل غد.) 
كلمة (شباب) جت بعد ضمير مخاطب (كم) والضمير دا بيعود على الكلمة دي ... يبقي إعراب (شباب) مفعول به منصوب وعلامة نصبه الفتحة.

كام ملحوظة على الاختصاص: 
- الاسم المختص بيكون حاجة من تلاتة (معرف بال) – (معرف بالإضافة) – (أيها أو أيتها) .... حاجة تاني غير التلاتة دول ما ينفعش تبقي مختص.
- يجوز أن يكون المختص علما.
- المختص دايما بيكون مفعول به لفعل محذوف وجوبا تقديره (أخص).
- المختص فضلة ... يعني ما يجيش إلا لما الجملة تخلص احتياجاتها الأول.
- الضمير اللي قبل المختص لازم يكون بيعود عليه ... فلو قلت (يا طالبي أحمد، اجتهد) ... الياء في (طالبي) اه ضمير متكلم لكن مش بتعود على أحمد ... عشان كدة (أحمد) مش مختص ... أحمد بدل منصوب لأن دي حالة لقب + اسم.
كام سؤال: 
1- (نحن العرب.) - (نحن العرب أقوياء.)، أعرب كلمة (العرب) في الجملتين.
(نحن العرب.) ... (العرب) ما ينفعش تبقي مختص ... لأن الجملة محتاجة خبر، وما فيش حاجة تقوم بدور الخبر غيرها ... عشان كدة إعراب (العرب) خبر مرفوع بالضمة.
(نحن العرب أقوياء.) ... (العرب) هنا تنفع تبقي مختص ... لأن فيه حاجة تقوم بدور الخبر غيرها وهي كلمة (أقوياء) ... فيبقي إعراب (العرب) مفعول به منصوب وعلامة نصبه الفتحة.

2- (نحن أيها الشباب أمل مصر.)
(أيها) اسم مبني على الضم في محل نصب مفعول به لفعل محذوف تقديره أخص، والهاء للتنبيه.
بس هو هنا الضمير عاد على (أيها الشباب) ؟! ... أها عاد عليه ... هنا واحد من الشباب بيكلم الشباب ... فتفضل اختصاص بردو.

3- (يجب علينا نحن أن نجتهد.)
اوعي تغلط وتعرب (نحن) مختص ... احنا قلنا المختص تلات حاجات بس وهما كلمة معرفة بأل أو كلمة معرفة بالإضافة أو أيها وأيتها ... لكن (نحن) دي ضمير ما ينفعش تبقي مختص ... اومال إعرابها إيه؟ بص يا زيدي ... (علينا نحن) ... مش (نا) دي ضمير متكلم .... و(نحن) بردو ضمير متكلم وجه وراها على طول ... تبقي توكيد لفظي .... يبقي إعراب (نحن) ضمير مبني في محل جر توكيد.