أساسيات في علم النحو لجميع المراحل

أساسيات
- الكلمة إما اسم وإما فعل وإما حرف.
هنتكلم عنها سريعا وهنذكر بعد التصنيفات المختلفة لكل واحد منهم واللي هنتناقش عن اللي يهمنا منهم بالتفصيل بعد كدة.
🌹 الاسم
الاسم ليه علامات وحاجات بتدل على إنه اسم.
- الاسم ممكن نقسمه:
معرب: يعني مجرور أو مرفوع أو منصوب ... ودا شيء متغير.
مبني: ليه علامة ثابتة مش بتتغير بيكون مبني عليها.
- الاسم ممكن نقسمه:
مصروف: يعني ينفع تنونه.
ممنوع من الصرف: يعني ما ينفعش تنونه.

🌹 الفعل
الفعل بيكون ليه علامات بتبينه مثلا إن بتتصل بيها ضماير معينة بتيجي قبله حروف محددة وهكذا.
- الفعل ممكن نقسمه لفعل ماضٍ ومضارع وأمر ودا اللي يهمنا إعرابيا.
- الفعل ممكن نقسمه:
تام: يعني ليه فاعل.
ناقص: يعني بيدخل ع الجملة الاسمية فيغيرها زي (كان وأخواتها).

- الفعل ممكن نقسمه:
متصرف: ينفع تجيب منه ماضي ومضارع وأمر واسم فاعل ومصدر.
جامد: تقدر تجيب منه حاجة واحدة بس منهم زي (عسى – نعم).
ناقص التصرف: بتجيب منه أكتر من حاجة واحدة بس مش كل حاجة زي الأفعال الناقصة (ما زال – ما برح – ما فتئ – ما انفك).
- الفعل ممكن نقسمه: 
لازم: مش بيحتاج مفعول زي (ذهب).
متعدي: بيحتاج مفعول به واحد أو أكتر زي (أكل – ظن – أخبر).
- الفعل ممكن نقسمه: 
صحيح: ما فيهوش حرف علة زي (أكل – شرب – علم).
معتل: فيه حرف علة زي (نام – صام – مات).

ملحوظة: حروف العلة هي الألف والواو والياء.
- الفعل ممكن نقسمه:
مزيد: فيه حروف زيادة عن أصله زي (استخدم) مزيد بثلاثة حروف (است) لأن أصله (خدم) وهكذا.
مجرد: ما فيهوش حروف زيادة عن أصله زي (أخذ – زاد – تم).

ملحوظة: حروف الزيادة مجموعة في كلمة (سألتمونيها).

🌹 الحرف
الحروف كلها مبنية ولا محل لها من الإعراب ... بس أحيانا بيأثروا على اللي بعدهم وساعات لأ ... فعشان كدة نقدر نفسم الحروف كالتالي:
حروف لها تأثير: زي حروف الجر وأدوات النصب والجزم إلخ.
حروف ليس لها تأثير.

- حروف الجر بنقسمها كالتالي:
حرف جر أصلي.
حرف جر زائد.
حرف جر شبيه بالزائد.
وهنتكلم عنها بالتفصيل في درس خاص بيهم.