المبتدأ والخبر شرح كامل في النحو

* المبتدأ والخبر
- المبتدأ ... يعني ايه مبتدأ؟ المبتدأ هو الكلمة اللي بيبدأ بيها المتحدث كلامه ... بدأ بيها فبقت مبتدأ ... فاعرف بقى ان اي كلمة بدأت بيها تبقى مبتدأ ... ماعدا حالات معينة هكلمك عنها لما نتقدم في الدرس شوية.

🌸 الخبر ... الشخص اللي بيتكلم بيبقى عايز يخبرنا بحاجة معينة من كل كلامه اللي بيقوله ... الحاجة اللي بيخبرنا بيها دي هي الخبر ... اسمهم من بعض بردو.

لو قلت مثلا (كل ماتفعلونه وليس يفيدكم ستندمون عليه يوما).
الكلمة اللي بدأت بيها هي المبتدأ ... يبقى كل مبتدأ مبتدأ مرفوع بالضمة.
الحاجة اللي عايز اخبركم بيها من كل كلامي هي (ستندمون عليه) ... يبقى جملة (ستندمون عليه) في محل رفع خبر.
يبقى من الآخر تركز على حاجتين ... اللي المتكلم بدأ بيه (المبتدأ) ... واللي المتكلم عايز يخبرنا بيه (الخبر).
أنواع الخبر

* الخبر تلات أنواع:

1- مفرد: زي (أحمد مؤدب) – (الولدان مجتهدان) – (الطغاة ظالمون) ... خبر مفرد يعني كلمة واحدة بس هي اللي بتتعرب خبر ومش معناه إنه ماينفعش يبقى جمع ولا مثني .
2- جملة:
- جملة اسمية زي (الحديقة أزهارها جميلة) – (أولادك تصرفهم وقور) – (هو الله كريم) .... (أزهارها جميلة) و(تصرفهم وقور) و(الله كريم) دول كلهم جمل لوحديهم ... جمل لوحديهم يعني هما لوحديهم يتعربوا مبتدأ وخبر بردو وفي علاقة بينهم غالبا وبين المبتدأ الأول والعلاقة دي بنسميها رابط ... المهم كل واحدة منهم جملة جوا جملة:D ... ركز على نظام جملة جوا جملة دا عشان هيفيدك كتير ... لما تلاقي جملة (زي أزهارها جميلة) جوا جميلة زي (الحديقة أزهارها جميلة) ... بنعرب الجملة دي بانعزال تام عن الباقي ... فيبقى الإعراب كالتالى: المتكلم ابتدا بكلمة (الحدائق) تبقى الحدائق مبتدأ ... بعد كدة لقينا إن المتكلم عايز يخبرنا عن جملة تانية (أزهارها جميلة) جوا جملته (الحديقة أزهارها جميلة) . فنبدأ من جديد ... المتكلم ابتدا ب (أزهارها) تبقى (أزهارها) أزهار مبتدأ ثاني والهاء ضمير مبني في محل جر مضاف إليه ... (جميلة) خبر المبتدأ الثاني ... وجملة (أزهارها جميلة) في محل خبر المبتدأ الأول (الحدائق).

- جملة فعلية ... زي (الولد يذهب إلى المدرسة) – (الفتيان يلعبون الكرة) ... دا نوع سهل جدا ... بيبقى الولد مبتدأ مرفوع بالضمة ... يذهب فعل مضارع والفاعل ضمير مستتر والجملة الفعلية في محل رفع خبر وبس كدة.

3- شبه جملة: (الولد في المدرسة) (العصفور فوق الشجرة) (النصر غدا) ... الخبر هنا بيبقى عبارة عن شبه جملة يعني (جر ومجرور) أو (ظرف).. الولد مبتدأ ... وشبه الجملة في محل رفع خبر.

لسا لينا كلام تاني في الأنواع بس حاليا ده كافي ... فما تحسبش إنك خلصت يا بابا ها؟ فاستعد وثبت دا حاليا.

🌸 تنبيه: 
1- (كيف) + اسم = خبر مقدم + مبتدأ مؤخر ... أما لو جه بعدها فعل فبيختلف الكلام بقى.
2- (كيف) + فعل = (حال) + فعل .... (كيف جاء أحمد) ... (كيف) اسم استفهام مبني في محل نصب حال ... ومش بتأثر ع الفعل بعدها.
3- (أين – متى – ثَمَّ – ثَمَّة) بنعربهم كالتالي ... اسم مبني في محل نصب ظرف.
4- (أين – متى – ثَمَّ – ثَمَّة) + اسم = شبه جملة في محل خبر مقدم + مبتدأ مؤخر. (أين الطعام)
5- (أين – متى) + فعل = ظرف + فعل. (أين تلعب بالكرة)