نصائح مهمة لطلاب الصف الثالث الثانوي - الثانوية العامة

في البداية أحب أوجه الكلام ده لطلاب الثانوية العامة من خلال تجارب دفع قبلهم لعل وعسى نقدر نفيدهم

مبدأيا الكلام دا هيكون موجه ل الناس اللى اول مره تمتحن ومش مأجله ، لو انت من ضمن الاستثناء دا ف حفاظا على وقتك متكملش ، لو عايز تقرأ تمام برده 

طيب.. هحاول انظم الموضوع ف بوينتس عشان يبقى سهل عليكم.. واحتراما ل وقتك البوست هياخد ربع ساعة منك.

١/ حاليا ناقص اسبوع او اقل على امتحاناتكم، ف يفضل اي حد مبدأش يمسك العربي يمسكه من بكره لان اول مادة لازم تتذاكر كويس وعلى قد ما تقدر تلمها صح.
٢/لو انت فاكر أن كل ما حليت بوكليتات كتير هتبقى برنس وهتقفل الامتحان تبقى غلطان.. مطلوب منك انك تحل على قد ما تقدر .. حل مش عشان عدد حلو عشان نفسك وتفيد نفسك وتراجع ، بس بردو مش معناها انك هتجيب اعلى ..
مش هنبعد بعيد. انا حليت ٥٥ بوكليت عربي وكان كل الدنيا فل بالنسبالى.. المهم نقصت كل درجاتى فى العربي حوالى ٣ ونص درجة ، فى حين ان اصحابي حاللين اقل وفى منهم قفل ونقص نص ..
ف حقيقي صدقنى ملهاش علاقه.

٣/ادعي ل اصحابك على قد ما تقدر، صدقنى هتحتاجهم لما تكبر ولما يكون عندك صاحب مشهور ودكتور أو مهندس او غيره هتفتخر بيه، شغل الغيره والكلام دا مينفعش ..

٤/ على قد ما تقدر الاسبوع دا تظبط العربي من كل النواحى ، العربي هيبقى لعبتك بإذن الله ، يفضل تظبط التعبير وتحل شوية مواضيع وتختبر نفسك ، فى فيديو منزله دكتور زياد عاصم عن طريقة كتابة التعبير وتقفله بكل سهولة + يفضل وانت بتدرب نفسك الموضوع ميزدش عن نص ساعة وياريت يبقى تلت ساعة معاك ..

٥/ ياريت تقنع نفسك أن مهما دخلت اي كليه دى حاجة بتاعه ربنا ف ياريت مهما رحت تكون فخور بنفسك وبكليتك ، انا عايزك دلوقتى تذاكر وتحل وتعمل اللى اخرك وتعترف فعلا انك تعبت وذاكرت وعملت اللى عليك وصدقنى ربنا هيكافئك. ولو تعبت ودخلت كليه مش عجباك ف اعرف أن ربنا كاتبلك الخير والتوفيق والراحة ف الكليه دى ، يعنى مثلا لو تعبت اوى وطلع عينك ف السنة دى وجبت مثلا ٩٠ فالميه ف اعرف انه خير مش يمكن لو جبت ٩٩ بالميه ودخلت طب او هندسة تبقى بعد الشر دكتور او مهندس مش شاطر؟ مش ممكن بردو؟..
ف ياريت حط دى فى دماغك وفكك من نظره المجتمع الهبلة دى..

٦/ لما ترجع من الامتحان بإذن الله يفضل متراجعش ، لانى هقولك حاجة..
انا كنت برجع من الامتحانات عادى ، نموذج البوكليت كان بينزل بعد كام ساعة ف مكنتش بقدر أمسك نفسى وبشوف اجاباتى.. 
العربي كنت بقول هنقص درجة درجتين بالكتير 
الانجليزى قلت هنقص نص لانى عملت كلمة ف الترجمة غلط 
الاحياء نص لانى نسيت بوينت ف الإجابة 
الكيمياء نص لانى نسيت شرط تفاعل 
الفيزيا نص لانى نسيت تمييز بتاع مسأله..
حلو؟
العربي نقصت فيه ٣ درجات ونص وكل المواد مقفلها !
قصدى افهمك أنه سيبها على ربنا ومتوترش نفسك ومتراجعش اصلك مش هتستفاد حاجة غير النكد والتوتر!
ف ليه؟!
*زمانك بتقول دلوقتى ايه دا الواد حاسب لنفسه ينقص نص ودرجة وبتاع دا انا هنقص ب ال ٣ على كدا شكلى 
لا يا حبيبي ، الامتحانات اقسم بالله سهلة وكلها بسيطة بس اللعب الوحيد هو القلق والتوتر ، هو اللى بيخليك مش مركز وهو اللى بيخليك تغلط وتنقص، هو اللى بيخليك تنقص ف كيرشوف رغم أن المسألة سهلة. ف ياريت تخلى بالك ..
___________

٧/لازم لازم لازم لازم تنام كويس قبل الامتحان ومتسهرش ، يفضل بالكتير اوى ليلة الامتحان على الساعة ٧ او ٨ تقفل الكتاب وتنام ..
لما تصحى انسى كلمة مراجعة دى خالص ، أوهم نفسك أن كل كتب العربي ضاعتمش عايزك تراجع ولا تعمل حاجة ، فقط روق نفسك وريح دماغك وانت رايح ، وفكك من العيال اللى واقفين قدام اللجان بتراجع المنهج كله فى دقيقة
___________
٨/قبل ما تروح الامتحان لما تصحى من النوم هيبقى يوم جديد وغريب عليك شوية وهتبقى متوتر جدا ، طمن نفسك بنفسك لان التوتر بينسى ..
ف بص لما تصحى روق كدا واتوضى وصلى الفجر تمام؟
بعدين صلى ركعتين لله بينك وبين نفسك غرضها أن ربنا يوفقك فى الامتحان اللى انت رايحه، حلو؟
بعدين اقرأ سورة يس ، بعدين كل وافطر كويس جدا واتوكل على الله 
___________
٩/ وسط الامتحان طبيعي والله العظيم انك تبقى ناسى رغم انك حالل السؤال دا مليون مره ، انا كنت بعمل ايه؟
كنت بقفل كراسة الإجابة وبروق نفسى وأقرأ سورة الفاتحة ، وادعي شوية واستعين ب ربنا وادعي أن ربنا يوفقنى وافتكر الإجابة.. دقيقة بالظبط وافتح الكراسه ، والله العظيم يابنى انا فعلا بفتكر الإجابة وفى أنهى صفحة وبالنص ، والله واتكررت معايا فى كل المواد كان لازم سؤال اقف فيه رغم انى حافظه وعارفه، ليه بقى بيحصل كدا؟
بسبب التوتر والقلق ..
فى امتحان الجيولوجيا كان فى كام بوينت وقفت فيهم وكانوا كتير فعلا!!
رحت سايبهم واتوترت وكل الأسئلة اللى حليتهم بعدها كانوا بعضهم غلط ، بتاع نقطتين تلاتة كدا ، 
المهم مخدتش بالى انى حليتهم غلط غير لما راجعت ، ف وانا يراجع قرأت الفاتحة وريحت دقيقة وكملت
وانا ببص اخدت بالى واستغربت أنى كتبت التعريف دا بتعريف تانى وخرفت حقيقي!!
وكل الأسئلة اللى كنت شاكك فيها والله عملتها صح ..
___________
١٠/لما ترجع من الامتحان متقفش مع زمايلك
ليه؟
اولا عشان كورونا ، ثانيا عشان متراجعش معاهم
ولما ترجع طمن عيلتك وعادى جدا 
فى اليوم اللى بعد الامتحان دا انت هتحس أن دماغك تقيلة ومصدع ومش قادر تكمل ، ف طبيعي جدا جدا جدا تريح وتفصل وتنام ، ولو قدامك وقت حلو قدام المادة التانية ريح والعب 
___________
١١/ بالنسبه ل محضر الشطب مهم جدا ، ركز بقول محضر شطب مش غش
لو شطبت او عملت حاجة غلط ، سؤال غلط كدا ، قول للمراقب لو سمحت عايز اعمل محضر شطب ، 
لأنه ممكن ورقتك تقع في ايد مصحح كسول ومش بيشوف المسودة أو ممكن يبقى نظره ضعيف ومش يشوف اللى انت حذفت عليه ، لذلك المحضر دا بينبهه انك عملت شطب على سؤال معين ، يعنى من الاخر محضر الشطب لصالحك ..
وفى بعض المراقبين بيقولوا لا دا محضر الشطب هيوديك لجنة خاصه وهينقصوك وبتاع * والكلام دا اتقالى فعلا من المراقبين* بس كلامهم دا فاكس منه والله، دور مراقبين ابتدائى ف ميعرفوش اوى يعنى

___________
١٢/شوية ملاحيظ صغيره كدا..
متنساش فى الاعراب ، اعراب الفعل اللى بيكون متصل ب ضمير لان الضمير عليه نص ، 
لو شاكك ف كذا إجابة ياريت تكتب اول إجابة اللى شاكك فيها بنسبة كبيره ، والتانية فى سطر تانى عادى جدا ..
متتوترش عشان هيخليك تنسى ف بلاش..

___________
١٣/ واخيرا ، انت مطالب يا ابنى يا حبيبي ب انك تذاكر وتحل وتراجع وبس ، النتيجة دى بتاعه ربنا ..
___________
•بس خلصت، اسف أنى طولت حقيقي، ولو فى اي نقطة نسيتها ومهمة ممكن اضيفها ف البوست دا او اعمل بوست تانى ليها ، واتمني حقيقي حقيقي اكون أفدتكم والله..
هدعيلكم كلكم بإذن والله وخير يارب
واذكروني ب دعوة بقى
واللى عنده سؤال يقولى..
بالتوفيق.