كاد وأخواتها شرج جميل ومتكامل - نحو

كاد وأخواتها

- كاد وأخواتها أفعال ناسخة ... بتدخل ع الجملة الاسمية فترفع المبتدأ ويبقي اسمها ... وتنصب الخبر ويبقي خبرها ... الله دي زي كان وأخوتها بقي؟؟ اه هي زيها بس في فرق واحد ان الخبر بتاع كاد وأخواتها بيبقى جملة فعلية وبس ... وفرق تاني هتعرفه قدام ... الفرقين دول هما السبب أن احنا درسناهم لوحدهم ... مش كتر أسماء دروس يعني وخلاص.

#- كاد وأخواتها بتنقسم لتلات أقسام هما:
1- أفعال المقاربة: (كاد – كرب – أوشك).

2- أفعال الرجاء: (عسى – حري – اخلولق) ... أهمهم (عسى) ... وافتكر بقى ان الحرف اللي يفيد الرجاء يبقي (لعل) أما الفعل اللي يفيد الرجاء يبقي (عسى).

3- أفعال الشروع: أفعال بتفيد بدء حدوث الفعل ... زي (شرع – بدأ - طفق - طفق – أخذ – جعل - أنشأ) وأغربهم (هب – هلهل) ... الأفعال دي كلها وخاصة (أنشأ وجعل وأخذ) لااازم يكونوا بيدوا معني البدء بحدوث الفعل ... لو ما دلوش على ده تبقي أفعال عادية وبعدها فاعل ومفعول به عادي.
أنواع خبر كاد وأخواتها

هو نوع واحد بس قلنا ... الخبر دايما بتاع كاد وأخواتها لااازم يكون جملة فعلية.

- أمثلة (بدأ الولد يذاكر) (توشك السماء أن تمطر) (عسى الله أن يرحمكم) (أخذ الطالب يجتهد) (اخلولقت السماء أن تمطر) (كاد الفريق يفوز).

# اقتران خبر كاد وأخواتها بـ(أن)
1- يمتنع اقتران خبر أفعال الشروع بـ(أن) ... دي أهم واحدة بتيجي ... إياااااك تنساها.
2- يقل اقتران خبر (كاد – كرب) بـ(أن).
3- يكثر اقتران خبر (عسى – أوشك) بـ(أن).
4- بجب اقتران خبر (حري – اخلولق) بـ(أن).

# الأفعال التامة
أفعال تامة يعني بييجي بعدها فاعل ومفعول عادي جدا ليها كذا شكل هنا هنقولهم ... يلا بينا:) بسم الله ... هما:
1- (عسى) لو جه بعدها (أن) ع طول من غير فاصل تبقى (عسى) تامة ... والمصدر المؤول بعدها فاعل ... زي (عسى أن تكرهوا شيئا وهو خير لكم) (عسى أن يعودوا) ... لو أعربنا (عسى أن يعودوا) هتبقي (عسى) فعل ماض جامد ... (أن تعودوا) حرف نصب وفعل مضارع منصوب بحذف النون وواو الجماعة في محل رفع فاعل ... والمصدر المؤول (أن تعودوا) في محل رفع فاعل ... عارف لو كنا قلنا (عسى الأولاد أن يعودوا) هنا في فاصل موجود بين عسى وأن اللي هو كلمة (الأولاد) فيبقي إعراب (عسى الأولاد أن يعودوا) ... (عسى) عسى فعل ماضي جامد , (الأولاد) اسم عسى ..(أن تعودوا) حرف نصب وفعل مضارع منصوب والمصدر المؤول في محل نصب خبر عسى.

2- امثلة كتير لأفعال الشروع وفعل (كاد) لما ما تديش معنى البدء في حدوث الفعل أو لو ما جاش الخبر جملة فعلية ... زي (أنشأ الله الأرض) ... (الله) فاعل ... (الأرض) مفعول به ... وزي (أخذ الولد قلمك) فاعل ومفعول بردو ... (بدأت السماء في الإمطار) هنا دلت علي بدء حدوث الفعل بس الخبر مش جملة فعلية فتبقي (السماء) فاعل عادي ..(جعلت القماش قميصا) القماش مفعول به أول وقميصا مفعول به ثاني ... هنتكلم عن الأفعال اللي بتنصب مفعولين في الدرس اللي بعد ده ... طول ما أنت معايا اطمن خااالص.

3- فعل (كاد) بيدي معنيين ... فلو قلنا (كاد الولد يصل) هنا بتفيد ان الولد قرب يوصل ... فكدة فعل من أفعال المقاربة لأنها أفادت ده يبقي (الولد) اسم كاد مرفوع ... (يصل) فعل مضارع والجملة الفعلية في محل خبر كاد ... أما لو قلنا (كاد اليهود للعرب) ... اولا قبل أي حاجة الخبر مش جملة فعلية ... كمان (كاد) بمعني مكر وخبث مش قرب وأوشك خاالص ... فهنا (اليهود) فاعل.