شرح الفاعل ونائب الفاعل - نحو

#- الفاعل ونائب الفاعل

#- الفاعل يعني ايه فاعل؟ ... طيب بذمتك دا سؤال يتسأل بردو؟ فاعل يعني عمل الفعل ... يعني قام بالفعل ... بس كدة؟ اه بس كدة ... طيب بس زود حتة كمان وقول "إن الفاعل هو من قام بالفعل أو اتصف به." ... فلو وصفت الفاعل هتوصفه باسم فاعل.
#- نائب الفاعل: دا لو وصفته هيديك اسم مفعول ... وبييجي بعد الفعل المبني للمجهول.
ملحوظة: اسم الفاعل مكسور ما قبل الاخر.

نوضح بأمثلة بقى أحسن:
1- لا يمكن العيش بدون هواء. 
2- لا يوجد هواء.
1- (لا يمكن العيش) تعالي نتخيل جملة ونوصف (العيش).. هنقول (العيش ممكن) ... الحرف اللي قبل الأخير مكسور ... تبقي (ممكن) اسم فاعل ... تبقى كلمة (العيش) في الجملة الاصلية (لا يمكن العيش) فاعل مرفوع بالضمة.

2- (لا يوجد هواء) ... لو جينا نوصف (هواء) في جملة من تخيلنا هتبقى مثلا (لا هواء موجود) ... موجود اسم مفعول يبقى كلمة (هواء) في الجملة الأصلية (لا يوجد هواء) نائب فاعل مرفوع بالضمة.

# طريقة أسهل
- أنت كدة عرفت أصل القاعدة وده اللي يهمني ... بس تحسها طريقة صعبة يا اخي ورخمة كدة وفيها تخيل واحنا بنسرح لوحدينا يعني ... تعالى أقولك طريقة أسهل.
- مش الفاعل بييجي بعد فعل مبني للمعلوم ... أما نائب الفاعل بييجي بعد فعل مبني للمجهول؟ اه ... أنا بقى هخليك تعرف أي فعل إذا كان مبني للمعلوم ولا مبني للمجهول مهما كان الفعل ده رخم ... ازاي بقي؟ ... بص يا زيدي:

1- الفعل المبني للمجهول: هو كل فعل ... المضارع بتاعه اتحقق فيه حاجتين انه يكون مضموم الأول وانه يكون مفتوح ما قبل الآخر .... لازم الاتنين يتحققوا مع بعض .... زي الفعل (يوجد) – (يُفترَض) – (يُشرَب).
2- الفعل المبني للمعلوم: هو كل فعل ... المضارع بتاعه ما ينفعش يكون مضموم أوله ومفتوح ما قبل آخره في نفس الوقت ... لازم الاتنين ما يتحققوش مع بعض ... بس لو واحدة بس اتحققت يبقي مبني للمعلوم عادي ... زي (يجد) – (ينبغي) – (يمكن) – (يجب) – (يشتعل).
- الفاعل ونائب الفاعل ما يتقدموش على الفعل أبدا ... مثلا (أحمد ذهب) ... إعراب (أحمد) مبتدأ ... (ذهب) فعل ماض والفاعل مستتر والجملة الفعلية في محل خبر.
- الفاعل يكون ضمير مستترا وجوبا طالما كان الفاعل ضميرا مستترا يعود على المخاطب أو المتكلم .... وإلا فيكون مستترا جوازا.

# الفعل الملازم للبناء للمجهول

في أفعال بتبقى على شكل المبني للمجهول دايما ورغم ده بييجي بعدها فاعل مش نائب فاعل ... ودي أفعال مشهورة واسمها الأفعال الملازمة للبناء للمجهول وهي: (حُمَّ – جُنَّ – سُلَّ – دُهِشَ – عُنِي – أُولِعَ – اُمتُقِع – غُمَّ – ذُهِيَ – فُلِجَ) .... مثال (جن الولد) ... (الولد) هنا اعرابه فاعل مرفوع بالضمة.
- في أفعال ظاهرها إنها ملازمة للبناء للمجهول بس هما مش كدة وبييجي بعدهم نائب فاعل زي (اُستُشهِدَ – تُوفيَ – اُحتضِر).