اسم الفاعل شرح عظيم - نحو

اسم الفاعل

اسم الفاعل ... دا اسم مشتق بنطلقه على اللي بيعمل الفعل أو بيتصف بيه ... وبيكون مشتق من الفعل المبني للمعلوم ... مثلا اللي بيحكم في المحكمة ... يقضي بالقانون عشان كدة سميناه (قاضي) ... والطالب بيطلب فسميناه طالب وهكذا.
كيفية صياغة اسم الفاعل

# 1- من الفعل الثلاثي
كل اللي بتعمله إنك بتخلي الكلمة على وزن (فاعِل) ... مثلا الفعل (ضرب) يبقي ضارب، (شرب) شارب، (صنع) صانع و(سأل) سائل إلخ.
- بس فيه كام حاجة لازم تنتبه ليها:
1- لو الفعل ثلاثي في نصه ألف زي (باع – قال – صام) ... مش معقول أننا هنقول (بااع – قاام – صاام) ... لأ هنا بنقلب الألف بتاعة الفعل همزة ... والهمزة تحتها كسرة فتبقي همزة على نبرة ... فتبقى (بائع – قائل – صائم) ... وكل الكلمات دي وزنها (فاعل) زي الطبيعي.
2- لو الفعل ثلاثي بادئ بهمزة زي (أكل – أمن – أمر) ... هنا في الأول لما نخليها على وزن فاعل هتبقى (أاكل – أامن – أامر) ... بس لازن تبقي عارف أن أي همزة جه بعدها ألف ساعتها الاتنين مع بعض ويتحولو لمد وتبقى (آكل – آمن – آمر).
3- لو الفعل الثلاثي منتهي بحرف علة زي (سعى – قضى – هدى) .... تبقي (الساعي – القاضي – الهادي) ... ما الشكل دا عادي اهو ... بتنبهنا عليه ليه؟ ... لأن أي اسم فاعل من فعل منتهي بحرف علة بيكون اسم منقوص ... فممكن يكونوا مكتوبين قدامك (ساعٍ – قاضٍ – هادٍ) ... فخلي دا في اعتبارك لو طلبت منك استخراج اسم فاعل.
4- لو الفعل الثلاثي كان آخره حرف مشدد زي (خصَّ – عدَّ – عمَّ) .... بيبقى اسم الفاعل منه (خاص – عاد – عام) مش بنفك التضعيف والمؤنث (خاصة – عادة – عامة) .... والكشف عنها في مادة (خصص – عدد – عمم). 
5- اسم الفاعل من (جاء – شاء – رأى) اسم الفاعل منهم هو (الجائي – الشائي – الرائي) ... ودا اسم منقوص فلما تتوفر شروط حذف الياء بيكون (جاءٍ – شاءٍ – راءٍ).

#

2- من الفعل غير الثلاثي
- سواء كان الفعل رباعي أو خماسي أو سداسي كلهم نفس الطريقة ... (أحسن – انسجم – استخدم) .... دي أفعال غير ثلاثية ... لما نجيب منهم اسم الفاعل ... كل اللي بنعمله إننا بنجيب المضارع منهم فيبقي (يحسن – ينسجم – يستخدم) ... ثم نحذف أول حرف ونحط بداله ميم مضمومة ونكسر ما قبل الآخر فتبقي (مُحسِن – مُنسجِم – مُستخدِم).
- بس بردو لازم تنتبه أن لو الفعل منتهي بحرف علة زي (ربَّى – اعتدى – استدعى) ... بيبقى اسم الفاعل منها (مربي – معتدي – مستدعي) ... ودي أسماء منقوصة ممكن تتكتب (مربٍ – معتدٍ – مستدعٍ) فخلي بالك من ده.